Ofninn

Ofninn okkar er sérsmíðaður eftir franskri fyrirmynd og var byggður á Böggvisstöðum í Svarfaðardal haustið 2018. Hann vegur 50 tonn og er hitaður með timbri úr nærliggjandi skógum.

Þegar búið er að hita ofninn er hann þrifinn og brauðin eru sett inn. Hitinn í steinunum bakar því brauðin.

Kjöraðstæður til brauðbaksturs skapast í svona ofni því hitinn tapast mjög hægt úr steinunum og brauðin verða því mjög jafnt bökuð.

Vegna þess hve hitinn helst vel, er hægt að baka ýmislegt annað eftir brauðbaksturinn, t.a.m. sætabrauð, smákökur og marengs, án þess að hita hann upp á milli.

Geymsluaðferðir

Ef geyma á brauðið sjáðu til þess að það andi. Ef því er lokað í plastpoka mun það mygla en hæfileg loftun lætur það þorna smátt og smátt. Gott er því að vefja viskustykki eða taupoka utan um það og setja það svo í skúffu eða skáp. Ef brauðið er sneitt látið sneiðarnar liggja þétt hver að annarri.

Leiðbeiningar um frystingu

Brauðið frystist vel.

Ef það er fryst í heilu lagi: Eftir að brauðið hefur þiðnað er hægt að stinga því í 2-3 mínútur í heitan ofn til að það glansi eins og nýtt.

Ef það er fryst í sneiðum: Mjög praktískt að taka eina og eina sneið úr frysti, skella svo í brauðrist eða grill rétt fyrir notkun og það mun bragðast dásamlega með smjöri og sultu.

Súrdeigið

Við það að bæta súrdeigi í brauðdeig, virkjast ýmis ensím. Eitt þessara ensíma brýtur niður glúteinið, má segja að það byrji að “borða” það, þannig að brauðið verður aðveldara í meltingu. Annað ensím sem virkjast einnig við súrnun, brýtur niður fýtatsýru, sem er í öllu korni. Það er mjög mikilvægt að þessi fýtatsýra sé brotin niður, því annars fæst ekki steinefni úr hveitinu (t.d. kalk og járn). Auk þess virkar hún eins og segull og dregur til sín steinefni úr líkama okkar ef hún er ekki brotin niður.
Annað, sem leiðir til auðveldari meltunar, er hvernig deigið er meðhöndlað. Hnoða þarf deigið varlega og í stuttan tíma til að glúteinefnasambandið styrkist ekki um of.

Vegna þess að sterkjan í súrdeigsbrauði meltist hægar, hækkar blóðsykurinn hægar við neyslu þess, sem er kostur fyrir fólk með sykursýki.

Gömul tegund af hveiti inniheldur meiri uppleysanlegar trefjar. Þær minnka upptöku fitu, og “neikvæðs kólesteróls” í blóðinu. Þær minnka einnig upptöku þríglýseríðs. Allt þetta hjálpar til við að koma í veg fyrir hjarta- og æðasjúkdóma.
Heilkorna súrdeigsbrauð meltist hægar, og þess vegna er mettunartilfinningin meiri og lengri eftir neyslu þess en annarra brauða -sem getur hjálpað gegn nörtunarþörfinni milli máltíða.

Súrdeigsbrauð haldast lengur fersk og er það út af fjölsykursamböndum sem framleidd eru af mjólkursýrubakteríum. Auk þess hafa þau líka heilsueflandi áhrif á líkamann”.

Kolefnisjöfnuður með viðarofni!

Steinofninn er kolefnisjöfnunartæki þar sem timbrið sem notað er hefur tekið í sig jafnmikið kolefni eins og það losar sig við við brunann.

Efnið í hann var allt innflutt fyrir utan sandinn sem notaður er til einangrunar sem er sandur frá Böggvissandi. Ofnasmiðurinn kom frá Frakklandi, hann er sérfræðingur í byggingu slíkra ofna og tók smíðin mánuð með hjálp tveggja aðstoðarmanna. Hann vegur 50 tonn í heildina. Hugmyndin er að þegar allur massinn er hitaður upp heldur steinninn hitanum það vel að ekki þarf að hita hann frá núlli í hvert skipti, og þarf því minni við.

Eldurinn er í sama rými og baksturinn á sér stað. Fyrst er ofninn hitaður upp og notum við íslenskt birki við það. Þvínæst er allt hreinsað út og loks eru brauðin bökuð með hitanum sem helst í steinunum.
Þetta er langbesta leiðin til að baka súrdeigsbrauð því hitastigið lækkar smátt og smátt á meðan brauðin eru inni og halda brauðin því betur raka sínum og geymast því lengur